El Palomar ya otres cocipáes

IMPORTANTE:En payares de 2004, dempués de 4 años enteros trabayando como se diz equí, dexáronme otru despachu presentable (perbonu, he dicir). Agora que toi a tiempu parcial, diéron-y esi despachu a un profesor a tiempu completu (cosa que sofito). Asina que... vuelvo (marzu de 2007) pal ``palomar'' que equí se describe. (Les fotos y los comentarios son de la mi primera etapa ellí).

Agora tarrezco entamar a quexicame sol tratu demencial que esta universidá da a Informática. Pero pémeque lo que sí he escubrir ye'l tratu denigrante que da a dellos de los sos meyores emplegaos.

La situación llaboral de los profesores contrataos debería avergoñar a una sociedá que quier decise civilizada y avanzada. Por favor, enantes de que entames con previsibles llories so lo vagos que son los profesores d'universidá y los privilexos de que disfruten, infórmate sol problema. Pue alcontrase too na maraviosa páxina del mio collaciu Cobas:

Amás esta situación xeneral, en concretu dellos de nosotros tamos recibiendo dende va más de diez años un tratu denigrante y inafletable dende el puntu vista profesional. Los profesores d'informática con despachu n'Uviéu atrópanse'n solláos malecíos, mentantu los profesores d'otros departamentos gocien de condiciones dignes. ¡Siete! de nosotros allugámonos dende que comencipiamos na universidá (al términu de 2000) y de contino n'un almacén, conocíu comu ``el palombar'', que nun taba acupáu dica nosotros aportamos. Pel branu, la temperatura nun baxó de 27ºC. Nun hay ventanes nin ventilación, namái delles lluceres. Nun hay espaciu físicu pa atender a un alumnu nin a naide más. Pel cursu ye corriente que magar eso los atendamos... dellos profesores al tiempu. Toos compartimos una sola llínia teléfonu, sofriendo caún de nosotros toles interrupciones posibles. Y esperen... que seyamos dotores, que vistiguemos y que callemos la boca.

El espaciu que podía servir pa solucionar los nuestros problemas va emplegase pa otres coses de les que nunca se demostró la necesidá, penriba la prioridá que tenía que ser que fargataes de profesores acostinen con unes condiciones de trabayu inafletables pa cualquier emplegador. Les autoridaes responsables, por motivos que nun creo que puean desplicar, faen oyíos sordos a los nuestros pidimientos y a cualisquier de los nuestros intentos de buscar una solución con bona fe. Nel caberu conceyu que caltuvimos refugáronse los nuestros datos, díxosenos cenciello que ``nun se podíen facer milacros'' (va dellos meses que denunciamos esta situación por escrito), llamósenos ``espíes'' por furnir datos (toos ellos públicos) que podíen servir pa diseñar una solución, y lo único que algamamos dempués de precar y soplicar... ye que los ocupantes del ``palombar'' ocupen (¡d'emprestao!) unos despachos de la planta baxa. Otres persones presentes nesi conceyu, que queríen emplegar esos despachos pa otres coses, dixeron que la ``solución'' parecíayos literalmente ``un timu''. Asina que, por querer trabayar en condiciones dignes, semos ``espías'' o ``timaores''.

Mentantu los profesores d'informática d'Uviéu disfruten de 6,5 metros cuadraos por profesor de media (y 6 d'ellos comparten el sitiu con los profesores ``itinerantes''), ¿cuántos metros tienen los demás? Mentantu hay titulaciones nesti mismu campus que dan clas sólo per les mañanes, con lo que el sitiu ta esperdiciáu más de la metá'l tiempu, ¿cómu ta l'horariu d'informática, de 9:00 a 21:00?

Así tan les coses. Si quies escucar cómu tres profesores atienden a tres alumnos al tiempu (concretamente nes tres meses que s'samuesen na semeya d'equí debaxo) nuna cova baxo la lluz d'un tubu fluorescente, aperta equí [WAV, 826 KB]. Si quies dar una güelta pel nuestru palombar, aperta equí [AVI/DivX, 814 KB]. (Nun te dexes engañar por tanta lluz; esto grabóse nun día muy, muy solanu.)

Na película "Cómo ser John Malkovich" ufiértase una desplicación so los techos baxos, tan creíble comu les que nos dieron a nosotros. [AVI/DivX, 8 MB] [Soníu n'español]

NOTA: Temporalmente permitiósenos emplegar otros despachos (namái a los 6 que tábemos nel palomar) mentantu atopen un sitiu afayaízu. Pero les coses siguen igual pa la mayoría de los profesores.

Entrando. Esta ye la entrada al mi despachu. Tien una ventaya: ye única (nun vi denguna tala pa dengún otru profesor). Pa meter los armarios, hubimos esmontar les barandielles.	Too ye relativo. Masque paezca mentira, daquién talanta que toa esa xente cueye (y pue trabayar) equí. Casi toos trabayen a tiempu completu. Amás... ¡asignaron más profesores a esti despachu que los que apaecen nel cartel!	El mi despachu. Nesti sitiu ye onde yo paso tantes hors. Nun cueye too, pero ye que nun pueo poner la cámara más lloñe (nun hay sitiu). Por cierto, esi ordenador portátil paguélu yo con les mis perres.
Ergonomía. Xusto equí trabaya un de los mis collacios. Ha tener curiáu al sentase o llevantase. Pémeque en DuPont igual diben tar un pocoñín esmolecíos si tuvieran un emplegáu nesta situación...	Más ergonomía. Equí trabayen los "itinerantes". Porque amás de los profesores fixos que lu ocupen, equí trabayen los profesores d'Informática que nun tienen despachu n'Uviéu.	Qué puerta más guapa. Esta ye la "puerta de entrada" al "despachu" de otru de los mis collacios. Pué vese que una siella nun pasa per esi sitiu.
¿En qué pueo ayudate? Esti ye el sitiu que tengo pa atender a cualisquier estudiante, collaciu o presona ayena a la Universidá. (Curiando nun ocupar el pasiellu; tres de mí ta el "despachu" de otru collaciu).	Tres despachos siguíos. El míu ye el del medio. Nun pue dicise que pidamos muncho pa trabayar, llevar asignatures con cásique 500 alumnos y vistigar...